საჩუქრები რომლებიც შენს გულში რჩება!

ახალი წელი ყოველთვის განსაკუთრებული დროა. ის ემოციების, სიყვარულის, ყურადღების და საჩუქრების სეზონია. ხშირად გვგონია, რომ საუკეთესო საჩუქრის შერჩევა ძალიან რთულია, თუმცა სინამდვილეში ყველაფერი ბევრად მარტივია, საკმარისია ვიპოვოთ ისეთი რამ, რასაც შეუძლია გაგვახსენოს მომენტი, ადამიანი ან წაუშლელი ემოცია.

საათები და სამკაულები ზუსტად ასეთი შემთხვევებისთვისაა შექმნილი. მცირე, მაგრამ სიმბოლური დეტალები, რომლებსაც ყოველდღიურად ვატარებთ ყოველთვის გვიჩენს გამორჩეულ ასოციაციას.

სწორედ ამიტომ, ყველაზე ძვირფასი საჩუქრები ემოციით იმახსოვრება. დღეს ამ ემოციებზე გვსურს მოგიყვეთ, იმ პატარა და გულწრფელ მომენტებზე, რომლებსაც თქვენ გვიზიარებთ ჩვენ ყოველდღიურად წლების მანძილზე და გვავსებთ უდიდესი სითბოთი, რომელიც ჩვენი მთავარი ინსპირაციის წყაროა.

გაიცანით რამდენიმე ისტორია ჩვენი მომხმარებლებისგან, რომელიც დაგანახებთ, თუ როგორ შეუძლია ერთ პატარა სამკაულს ან საათს მთელი წლის განწყობის შეცვლა.

„Tissot – საათი, რომელიც ბავშვობაში მაბრუნებს“

„ბავშვობაში ბაბუაჩემთან გატარებული დღეები ყველაზე ნათელი მოგონებებია რაც მაქვს. ყოველ ჯერზე როცა სადმე გავდიოდით დიდი ყურადღებით იკეთებდა თავის Tissot-ს საათს – კლასიკურს, ტყავის ყავისფერ სამაჯურზე და ოდნავ გაკაწრული მინით. მახსოვს, როგორ ვუყურებდი, როგორ ასწორებდა სამაჯურს და მერე ღიმილით მეუბნებოდა – დრო ძვირფასია, ამიტომ უნდა გიყვარდეს თითოეული წამი.

მაშინ ამ სიტყვებს ვერ ვაცნობიერებდი, მაგრამ ახლა თითოეული წინადადება სხვანაირი სიმძაფრით მახსენდება.

წლების შემდეგ, როცა ბაბუა აღარ მყავდა, სახლში მისი Tissot-ს საათი ინახებოდა ძალიან ფაქიზად, როგორც ერთ-ერთი ყველაზე ძვირფასი ნივთი, რომელიც დაგვრჩა. ერთხელ ახალი წლის წინა დღეს კი დედამ მითხრა: გინდა ეს საათი შენ გქონდეს?

სწორედ ამ დღიდან, ყოველ ჯერზე როცა ვიკეთებ Tissot-ს საათს დრო თითქოს უკან მიედინება, იმ პატარა ეზოში ვბრუნდები სადაც ბაბუასთან ერთად ვთამაშობდი ყოველდღე.

Tissot ჩემთვის უბრალოდ ბრენდი არ არის. ეს არის ხიდი – დროს, ადამიანს და სიყვარულს შორის.

დღესაც, როცა მაჯაზე Tissot მიკეთია ვგრძნობ, თითქოს ბაბუს ისევ გვერდით მიდგას და ზუსტად ვიცი, არ აქვს მნიშვნელობა თუ რამდენი წელი გავა, ეს საათი ყოველთვის ბავშვობაში დამაბრუნებს.“

“Victorinox – კოლექცია, რომელიც ისტორია გახდა“

„პირველი შვეიცარიული, პატარა, წითელი ფერის დანა საზღვარგარეთ მოგზაურობისას ვიყიდე. მას შემდეგ ბრენდისადმი ინტერესი თანდათან მეზრდებოდა, რადგან ეს იყო სიმბოლო საიმედოობის, ხარისხისა და იმ პატარა თავგადასავლების, რომლებიც ახალგაზრდობას მახსენებს.

წლები გავიდა, პირველი დანა უკვე კარგად გაცვეთილია, მაგრამ სწორედ მასთან ერთად დაიწყო ჩემი კოლექციონერობა.

ყოველ წელიწადს, ჩემს დაბადების დღეზე ან ახალ წელს საკუთარ თავს ერთ ახალ Victorinox-ს ვჩუქნიდი.

ერთ დღეს, სრულიად შემთხვევით თქვენს მაღაზიაში აღვმოჩნდი და მახსოვს მაშინ ვიფიქრე – „ეს ადგილი ჩემი კოლექციის დაწყების სათავეა“.

მას შემდეგ ჩემი საუკეთესო ეგზემპლარების დიდი ნაწილი თქვენთან მაქვს შეძენილი, ლიმიტირებული გამოშვება, განსაკუთრებული ფერები თუ გამორჩეული ფუნქციები. ზოგჯერ მაღაზიაში უბრალოდ შემოვდივარ ხოლმე, რომ დავრწმუნდე, რომ ყველაზე ლამაზი მოდელები უკვე ჩემს ხელთაა.

თქვენი გუნდისგან ყოველთვის ისეთი სითბო და ცოდნა მოდის, რომ თითოეული დანა უბრალოდ ნივთი კი არა, ისტორია ხდება.

ხანდახან მეგობრები მეკითხებიან რათ გინდა ამდენი Victorinox-ის დანაო, მაგრამ ვერ ხვდებიან რომ თითოეული მათგანი ჩემთვის რაღაც მომენტს ინახავს. პირველი მოგზაურობა, პირველი დაბადების დღის საჩუქარი, პირველი გამარჯვება საკუთარ თავზე თუ მრავალი სხვა.

ახლა უკვე ერთი პატარა მინის თაროც მაქვს, სადაც ჩემი კოლექციაა განთავსებული. ყოველთვის როცა ახალ დანას ვამატებ, თავს პატარა ბავშვად ვგრძნობ. მგონია, რომ თითოეულ მოდელს თავისი ხასიათი და ისტორია აქვს.

ვიცი, რომ ამ კოლექციას ვერასდროს დავასრულებ, Victorinox-ის სამყაროში კიდევ უამრავი ისტორია მელოდება და მიხარია, რომ ამ მოგზაურობის ნაწილი სწორედ მე ვარ.“

„SWATCH – ბრენდი, რომელმაც გამიფერადა ცხოვრება“

„შვეიცარიული ბრენდი Swatch არის ის პირველი ბრენდი, რომელმაც თბილისის ქუჩებს სხვა ელფერი შესძინა. პირველი გამჭვირვალე მაღაზია, რომელიც გმირთა მოედანზე გაიხსნა ყოველთვის იპყრობდა ჩემს ყურადღებას რადგან სხვებს არ ჰგავდა.

მაღაზიაში შესვლისთანავე თავი ხელოვნების გალერეაში მეგონა. თამამი, მარტივი, ფერადი და საინტერესო დიზაინის მოდელების თვალიერებით საათები გავატარე.

პირველი Swatch-ის საათი სილიკონის სამაჯურზე, მკვეთრი ლურჯი ფერის ვიყიდე. მაშინ მივხვდი, თუ რატომ იზიდავდა ხალხს ეს ბრენდი, საათის მაჯაზე გაკეთებისთანავე თითქოს სხვა განწყობა გექმნება, მხიარულდები და რაღაც თავისუფლების შეგრძნებაც გეუფლება.

მას შემდეგ, ჩემი Swatch-ის საათების რაოდენობა იზრდებოდა და მე მივხვდი, რომ ეს უბრალოდ აქსესუარი არ არის. ეს არის გზა, რომლითაც საკუთარ სტილს ვქმნი. ხანდახან მკვეთრად, ხანდახან მინიმალისტურად, ხანდახან კი ექსპერიმენტულად. თითოეულ ჩემს საათს საკუთარი სიუჟეტი და ისტორია აქვს და ხშირად ვამბობ ხოლმე – Swatch არ არის მხოლოდ დროის აღმრიცხველი, ეს არის განწყობა, რომელსაც თავად იქმნი.

ალბათ მართალიც ვარ, რადგან ყოველთვის, როცა ახალ მოდელს ვამატებ ზუსტად იმ ფერს და იმ ენერგიის მატარებელს ვარჩევ, რომელიც იმ დღეს ყველაზე მეტად მჭირდება. სწორედ ამიტომ მიყვარს Swatch განსაკუთრებულად, ეს არის ბრენდი, რომელმაც მასწავლა, რომ ჩემი დღის გალამაზება, გაფერადება ჩემს ხელშია და თუ მე მინდა ფერად სამყაროში ცხოვრება, ეს ასეც იქნება!„

“DoDo – სამკაული, რომელზეც ყოველდღე დახედვა ჩემთვის ყველაზე მნიშვნელოვან დღეს მახსენებს“

DoDo-იტალიური ბრენდი, რომელიც 1994 წელს საიუვილერო ბრენდმა Pomellato-მ შექმნა.

“DoDo, ბრენდი, რომელიც ყოველთვის განსაკუთრებულად მომწონდა – მათი იდეა, სიმბოლოები და პატარა, ელეგანტური დეტალები თითქოს საკუთარი ისტორიების მოყოლასაც კი ახერხებს, მაგრამ ერთი კონკრეტული სამაჯური ჩემთვის ყველაზე ძვირფასი გახდა.

ზაფხულში, რამდენიმე წლიანი განშორების შემდეგ ჩემი ძმა ჩამოვიდა, ოჯახში დიდი სიურპრიზი მოგვიწყო, მეორე დღეს კი პატარა ვარდისფერი ყუთი გამომაწოდა. დახედვისთანავე მივხვდი, რომ ეს DoDo-ს სამკაული იყო, შიგნით კი პატარა ოქროსფერი ყელსაბამი ვარსკვლავის ჩარმით დამხვდა. ძალიან ნაზი, დახვეწილი და მინიმალისტური.

მითხრა – „ეს ვარსკვლავი შენ გგავს, სულ ყველგან ანათებ და სადაც არ უნდა წავიდე, ყოველთვის ვხედავ და ვიცი, რომ სადღაც ჩემი ადამიანი მელოდება“.

იმ წამს ისეთი სითბო ვიგრძენი, თითქოს ბავშვობაში დავბრუნდი, როდესაც ერთად საღამოობით ფანჯარასთან ვჯდებოდით და ვარსკვლავებით მოჭედილ ცას ვუყურებდით. მას შემდეგ ეს ყელსაბამი ყოველდღე ჩემთან ერთადაა. ხშირად, შემთხვევით დახედვისასაც კი, ისევ იმ საღამოს ვბრუნდები – ოჯახი, სიცილი, სითბო და ჩემი ძმის სიტყვები, რომელთა მოსმენაც ძალიან მჭირდებოდა.

DoDo-ს ვარსკვლავი ჩემთვის უბრალოდ სამკაული არაა. ეს არის პატარა სინათლე, რომელიც ყოველთვის მახსენებს, ყველაზე მნიშვნელოვანს!“

და ბოლოს, რაც ყველაზე მთავარია..

ყველა ამ ისტორიას ერთი რამ აერთიანებს – საჩუქარი შეიძლება იყოს პატარა, მაგრამ ის ემოცია, რასაც ატარებს, ხშირად ბევრად მეტია, ვიდრე თავად ნივთი.

თქვენთვის ჩვენი საათები და სამკაულები უბრალოდ აქსესუარი არ არის – ეს არის წუთები, მოგონებები, საყვარელი ადამიანები, ფერები, განწყობა, თავისუფლება და სიმბოლოები, რომლებთან ერთადაც ცხოვრობთ.

ახალ წელს ყოველთვის ახლავს ახალი დასაწყისი და ახალი ემოციები. თუ ამ სეზონზე საჩუქარს ეძებთ, ან უბრალოდ გინდათ საკუთარი დღეები უფრო ფერადი, ემოციური და დასამახსოვრებელი გახადოთ, იცოდეთ, რომ სწორი საათი და სამკაული თქვენს ისტორიას ისეთად აქცევს, რომელიც წლების შემდეგაც გაგიჩენთ ღიმილს.

გვეწვიეთ, დაათვალიერეთ, მოირგეთ და გახსოვდეთ, რომ ჩვენი Arttime-ის ისტორია და ემოცია ხართ თქვენ – ჩვენი საუკეთესო საჩუქარი!